"അവർ ഏക മനസ്സോടെ അനുദിനം ദേവാലയത്തിൽ ഒന്നിച്ചു കൂടുകയും ഭവനംതോറും അപ്പം മുറിക്കുകയും ഹൃദയ ലാളിത്യത്തോടും ആഹ്ലാദത്തോടും കൂടെ ഭക്ഷണത്തിൽ പങ്കുചേരുകയും ചെയ്തിരുന്നു." അപ്പ. പ്രവ: 2-46.

ആദിമ സഭയുടെ ഈ പ്രത്യേകതകൾ നമ്മുടെ ജീവിതശൈലിയിലും പിന്തുടരുന്നതിനു വേണ്ടി രൂപീകൃതമായിരിക്കുന്നതാണ് കുടുംബ കൂട്ടായ്മകൾ. ഓരോ കുടുംബ കൂട്ടായ്മയിലും പ്രാർത്ഥന, വചനം പങ്കു വയ്ക്കൽ, ആശയവിനിമയം, പരോപകാര പ്രവർത്തനങ്ങൾ, സ്നേഹവിരുന്ന് എന്നിങ്ങനെ വിവിധ കാര്യങ്ങൾ സംയോജിക്കുന്നു.

1950 ജൂലൈ മാസം ഇരുപത്തി അഞ്ചാം തീയതി രൂപീകൃതമായ പാലാ രൂപതയുടെ കീഴിൽ നിലവിൽ 171 ഇടവകകളും 17 ഫൊറോനകളും ഉണ്ട്. എല്ലാ ഇടവകകളിലും കുടുംബ കൂട്ടായ്മകൾ നടന്നുവരുന്നു. രൂപതാ തലത്തിൽ റിസോഴ്സ് ടീമും ഫൊറോന തലത്തിൽ ഫൊറോന സമിതിയും ഇടവക തലത്തിൽ സെൻട്രൽ കമ്മിറ്റിയും പ്രവർത്തിക്കുന്നു. രൂപതയിലെ കുടുംബ കൂട്ടായ്മ പ്രവർത്തനങ്ങൾ ഏകോപിപ്പിച്ച് നടത്തുന്നത് ബഹു. ജേക്കബ് വെള്ളമരുതുങ്കൽ അച്ചനാണ് .

മറ്റക്കര ഇടവകയിൽ 15 കൂട്ടായ്മകൾ നിലവിൽ പ്രവർത്തിച്ചു വരുന്നു. ബഹു. വികാരിയച്ചന്‍റെയും സിസ്റ്റേഴ്സിന്‍റെയും നേതൃത്വത്തിൽ എല്ലാ മാസത്തിലും കൂട്ടായ്മകൾ നടത്തി വരുന്നു. കൂട്ടായ്മയുടെ ആദ്യ ഭാഗത്ത് പ്രാർത്ഥനയും വചന വിചിന്തനവും ആണ്. തുടർന്ന് കൂട്ടായ്മയിൽ ആവശ്യമായ ചർച്ചകളും നിർദ്ദേശങ്ങളും നടക്കുന്നു. കൂടാതെ അംഗങ്ങളുടെ വിവാഹ വാർഷികം, ജന്മദിനം, വ്യക്തിപരമായ നേട്ടങ്ങളെ അംഗീകരിക്കൽ, ഉന്നത വിജയം നേടുന്ന കുട്ടികളെ ആദരിക്കൽ എന്നിവ നടത്തുന്നു. എല്ലാ വർഷവും നവംബർ മാസത്തിൽ വാർഡ് തല വാർഷികവും ജനുവരി മാസത്തിൽ ഇടവക തല വാർഷികവും നടത്തുന്നു. ഓരോ കൂട്ടായ്മയിൽ നിന്നും പ്രസിഡന്‍റ്, വൈസ് പ്രസിഡന്‍റ്, സെക്രട്ടറി, ജോയിന്‍റ് സെക്രട്ടറി, ട്രഷറർ എന്നിങ്ങനെ 5 പേരെ വീതം തെരഞ്ഞെടുക്കുന്നു. അവരിൽ നിന്ന് അഞ്ചു പേരെ ഇടവക സെൻട്രൽ കമ്മിറ്റിയിലേക്ക് തെരഞ്ഞെടുക്കുന്നു. കൂട്ടായ്മയുടെ പ്രവർത്തന ഫലമായി സമീപവാസികളുടെ പ്രശ്നങ്ങൾ മനസ്സിലാക്കുന്നതിനും ഉചിതമായ പരിഹാര മാർഗങ്ങൾ നിർദ്ദേശിക്കുന്നതിനും സഹായങ്ങൾ ചെയ്തു കൊടുക്കുന്നതിനുമുള്ള മനോഭാവം വളർത്തിയെടുക്കുന്നു. കൂട്ടായ്മയുടെ ഫലമായി പരസ്പരം ഒന്നിച്ചു കൂടുവാനും പ്രത്യേകിച്ച് ചരമവീടുകളിൽ പ്രാർത്ഥനകൾക്ക് നേതൃത്വം നൽകുന്നതിനും മറ്റു ക്രമീകരണങ്ങൾ നടത്തുന്നതിനും വാർഡ് അംഗങ്ങൾ സഹകരിക്കുന്നു. ഇടവകയുടെ പ്രവർത്തനങ്ങളിൽ കൂടുതൽ സജീവമാകുവാനും ആരാധന, വി. കുർബാന എന്നിവയിൽ കൂടുതൽ പങ്കാളികളാകുവാനും കുടുംബ കൂട്ടായ്മകൾ സഹായിക്കുന്നു.