മണൽ ജംഗ്ഷനിൽ കുരിശു പള്ളിയോട് ചേർന്നുള്ള 13.5 സെൻ്റ് സ്ഥലത്ത് ഒരു വ്യാപാര കേന്ദ്രം നിർമ്മിക്കുന്നത് ഇടവകക്കാരുടെ ദീർഘകാല അഭിലാഷമായിരുന്നു. 1998 ഫെബ്രുവരി ഒന്നാം തീയതി ബഹുമാനപ്പെട്ട അലക്സ് മൂലേക്കുന്നേൽ അച്ചൻ്റെ അധ്യക്ഷതയിൽ കൂടിയ പൊതുയോഗത്തിൽ വച്ച് ശതാബ്ദി സ്മാരകമായി മണൽ ജംഗ്ഷനിൽ രണ്ട് നിലകളുള്ളതും താഴത്തെ നിലയിൽ 9 മുറികൾ ഉള്ളതുമായ ഒരു ഷോപ്പിംഗ് കോംപ്ലക്സ് പണിയുവാൻ തീരുമാനിച്ചു. എന്നാൽ സാമ്പത്തിക ഞെരുക്കം മൂലം നിർമ്മാണ പ്രവർത്തനങ്ങൾ മന്ദഗതിയിലാവുകയും 2000 ഓഗസ്റ്റ് 20 ന് കൂടിയ പൊതുയോഗത്തിൽ മൂന്ന് നിലയുടെ അടിസ്ഥാനമിട്ട് ഒരു നിലയിൽ കെട്ടിടം പണിയുവാൻ തീരുമാനിക്കുകയും ചെയ്തു. 2000 ഡിസംബർ മാസത്തിൽ ഫാദർ അഗസ്റ്റിൻ കടുകൻമാക്കലിന്‍റെ നേതൃത്വത്തിൽ കെട്ടിടത്തിന്‍റെ പൈലിംഗ് ജോലികൾ ആരംഭിച്ചു. 2003 ജൂലൈ 13 ന് ബഹുമാനപ്പെട്ട ജോസഫ് ഇടത്തുംപറമ്പിൽ അച്ചൻ്റെ അധ്യക്ഷതയിൽ കൂടിയ പ്രതിനിധിയോഗം മണൽ കെട്ടിടത്തിന്‍റെ പുതിയ എസ്റ്റിമേറ്റ് തയ്യാറാക്കി പണികൾ പുനരാരംഭിക്കുവാൻ തീരുമാനിച്ചു. 2006 ഡിസംബർ മാസത്തിൽ പണികൾ പൂർത്തീകരിച്ച് മിക്ക മുറികളും വാടകയ്ക്ക് നൽകി. 2015 മെയ് നാലിന് കൂടിയ പൊതുയോഗത്തിൽ വാണിജ്യ സാധ്യതകൾ കണക്കിലെടുത്ത് മണൽ കെട്ടിടത്തിന് മുകൾ നില പണിയുന്നതിന് തീരുമാനിച്ചു. 2017 ജൂൺ മാസത്തിൽ വ്യക്തിഗത വായ്പകളുടെ സഹായത്തോടെ കെട്ടിടത്തിന്‍റെ മുകൾ നിലയുടെ നിർമ്മാണം പൂർത്തിയാക്കി. എട്ടു കടമുറികളും ചെറിയ വരാന്തയുമായി മുകൾ നില വാർത്ത് തറ ടൈൽസ് ഇട്ട് മുറികൾ തിരിച്ച് ഉപയോഗ യോഗ്യമാക്കി. ഈ ഉദ്യമത്തിന് നേതൃത്വം നൽകിയ റവ ഫാ. അലക്സ് മൂലേക്കുന്നേൽ, റവ ഫാ. അഗസ്റ്റിൻ കടുകൻമാക്കൽ,റവ ഫാ. ജോസഫ് ഇടത്തും പറമ്പിൽ, റവ ഫാ. ജോസഫ് കുമ്മിണിയിൽ എന്നിവരെ സ്നേഹത്തോടെ സ്മരിക്കുന്നു. ഈ നിർമ്മാണ പ്രവർത്തനങ്ങൾക്ക് നേതൃത്വം നൽകിയ കൈക്കാരന്മാർ, വിവിധ കമ്മറ്റി അംഗങ്ങൾ എന്നിവർക്ക് അഭിനന്ദനങ്ങളും ആത്മാർത്ഥമായ നന്ദിയും രേഖപ്പെടുത്തുന്നു. തിരുക്കുടുംബം ഓരോരുത്തരെയും സമൃദ്ധമായി അനുഗ്രഹിക്കട്ടെ.

1958-ല്‍ ഇന്നത്തെ വടക്കേടം ജംഗ്ഷനിൽ വാക്കയിൽ മത്തായി ദേവസ്യയോട് വാങ്ങിയ ഏഴ് സെൻ്റ് സ്ഥലത്ത് ഒരു കുരിശുപള്ളി മൂന്ന് എടുപ്പായി പണി കഴിപ്പിച്ചു.1978 -ൽ അതിൻ്റെ ആകൃതി മാറ്റി ഇന്നത്തെ രൂപത്തിൽ കുരിശുപള്ളി പുതുക്കിപ്പണിതു. കൂടാതെ കൊച്ചുമഠത്തിൽ ജോസഫ് ചാണ്ടിയോട് 2.75 സെൻ്റ് സ്ഥലം കൂടി വാങ്ങി സ്റ്റേറ്റ് ബാങ്ക് കെട്ടിടം പണിതു. ഈ കെട്ടിടത്തിന് മുകളിൽ രണ്ട് കടമുറികളും താഴെ മൂന്ന് കട മുറികളുമാണ് ഉള്ളത്.

"ഞാനാണ് പുനരുദ്ധാനവും ജീവനും. എന്നിൽ വിശ്വസിക്കുന്നവൻ മരിച്ചാലും ജീവിക്കും."
യോഹ 11:25

തേനും പാലും ഒഴുകുന്ന കാനാൻ ദേശം സ്വപ്നം കണ്ട് മോശയോടൊപ്പം ഇസ്രായേൽ ജനം യാത്ര ചെയ്തത് പോലെ മിശിഹായിലൂടെ യാഥാർത്ഥ്യമാകുന്ന ദൈവരാജ്യം തേടി നാമും യാത്ര ചെയ്യുകയാണ്. പാപത്തിന്‍റെ അടിമത്തത്തിൽ നിന്നും മോചനം നേടി സ്വർഗ്ഗരാജ്യം എന്ന പ്രത്യാശ വെച്ച് മുന്നോട്ട് നീങ്ങുന്നവരാണ് ക്രൈസ്തവർ. ഈ പ്രത്യാശയാണ് ക്രൈസ്തവ ജീവിതത്തിന് അർത്ഥം നൽകുന്നത്.

മനുഷ്യൻ ഒരിക്കൽ മരിക്കണമെന്നതും മരണശേഷം വിധിക്ക് വിധേയനാകണമെന്നതും ദൈവഹിതമാണ്. ജീവിതത്തിൻ്റെ സാധാരണഗതിയിലുള്ള അന്ത്യമായി പഴയനിയമം മരണത്തെ ചിത്രീകരിക്കുന്നു. എന്നാൽ, പുതിയ നിയമം മരണത്തിന് പുതിയൊരു അർത്ഥതലം നൽകുന്നുണ്ട്. നശ്വരമായതിൽ നിന്നും അനശ്വരമായതിലേക്കും ഭൗമികമായതിൽ നിന്ന് സ്വർഗീയമായതിലേക്കുമുള്ള കടന്നു പോകലാണ് മരണം. അന്ത്യ വിധിനാളിൽ എല്ലാ ജനതകളും ഒരുമിച്ചു കൂട്ടപ്പെടുകയും നന്മ ചെയ്തവരെ മഹത്വീകരിക്കുകയും തിന്മ ചെയ്തവരെ ശിക്ഷിക്കുകയും ചെയ്യും. പിതാവിൻ്റെ വലതുഭാഗത്ത് ഉപവിഷ്ടനായിരിക്കുന്ന ഈശോ മരിച്ചവരെയും ജീവിക്കുന്നവരെയും വിധിക്കാൻ വരുമെന്നുള്ളത് ക്രൈസ്തവ വിശ്വാസത്തിൻ്റെ അടിസ്ഥാനമാണ്.

മറ്റക്കര ഇടവകയിൽ നിന്ന് നിത്യസമാനത്തിന് വിളിക്കപ്പെടുന്ന ഇടവകാംഗങ്ങളുടെ ശവസംസ്കാരത്തിനായി 1924 ഒക്ടോബർ 12 -ാം തീയതി കൂടിയ പൊതുയോഗത്തിൽ പള്ളിയുടെ തെക്കുവശത്ത് ചായിപ്പിനും പ്രദക്ഷിണ വീഥിയ്ക്കുമപ്പുറം സെമിത്തേരി, "നിത്യതയുടെ കവാടം", പണിയുവാൻ തീരുമാനിച്ചു .പിന്നീട് കാലാകാലങ്ങളിൽ ആവശ്യാനുസരണം പുതിയ കല്ലറകളുടെ നിർമ്മാണവും ആവശ്യമായ കൂട്ടിച്ചേർക്കലുകളും ഉണ്ടായി. ചുറ്റുമതിലും മൃതദേഹം വയ്ക്കുന്നതിനുള്ള പന്തലും നിർമ്മിക്കപ്പെട്ടു. ഇതിന് നേതൃത്വം നൽകിയ ബഹുമാനപ്പെട്ട അച്ചന്മാർ, കൈക്കാരന്മാർ, കമ്മിറ്റി അംഗങ്ങൾ, സ്ഥലദാതാക്കൾ എന്നിവരെ നന്ദിയോടെ സ്മരിക്കുന്നു.

1970 -ൽ ബഹുമാനപ്പെട്ട മാത്യു മാന്തോട്ടത്തിൽ അച്ചനാണ് കൽക്കുരിശ് വഴിക്കരികിൽ നിന്നും ഇപ്പോൾ സ്ഥിതി ചെയ്യുന്ന സ്ഥലത്തേക്ക് മാറ്റി സ്ഥാപിച്ചത്. ഈ കുരിശുംതൊട്ടി താഴേക്ക് ചെരിഞ്ഞു കിടക്കുന്ന സ്ഥലം ആയിരുന്നു. തിരുനാൾ പ്രദക്ഷിണങ്ങൾക്കും കഴുന്ന് എഴുന്നള്ളിപ്പിനും മറ്റും ഇത് അസൗകര്യം ആയിരുന്നു. തിരുനാൾ അവസരങ്ങളിലെ കലാപരിപാടികൾ ഇരുന്ന് ആസ്വദിക്കുവാനും ഏറെ ബുദ്ധിമുട്ടായിരുന്നു. ഈ വസ്തുതകൾ പരിഗണിച്ച് 1996 ഫെബ്രുവരി പത്താം തീയതി ബഹുമാനപ്പെട്ട അലക്സ് മൂലേക്കുന്നേൽ അച്ചൻ്റെ അധ്യക്ഷതയിൽ ചേർന്ന പൊതുയോഗം ശതാബ്ദി ആഘോഷങ്ങൾക്ക് മുമ്പായി കുരിശും തൊട്ടി നിരപ്പാക്കാനും മണ്ണിടിച്ച് മാറ്റുന്ന സ്ഥലത്ത് രണ്ടു വശങ്ങളിലായി നടകൾ കെട്ടി ഇരിപ്പിടം പോലെ സ്റ്റേഡിയം പണിയുവാനും സ്റ്റേഡിയത്തിന് തെക്കുവശത്ത് ഒരു സ്റ്റേജ് പണിയുവാനും തീരുമാനിച്ചു. ഏതാണ്ട് എട്ടു മാസങ്ങൾ കൊണ്ട് ഇതിന്‍റെ പണികൾ പൂർത്തിയായി. ഇതിന് ശതാബ്ദി സ്മാരക സ്റ്റേഡിയം എന്ന് പേരിട്ടു.